“Red Star Over China” စာအုပ်၏ ကမ္ဘာ့ပဲ့တင်သံ

တရုတ်နိုင်ငံ ပေကျင်းဆန်းလျင်စာအုပ်တိုက်မှ ၁၉၇၉ ခုနှစ်တွင် ပုံနှိပ်ထုတ်ဝေသော “အနောက်ဘက်ခရီးသွား မှတ်တမ်း” စာအုပ် (ဝဲ) နှင့် ပြည်သူ့စာပေပုံနှိပ်တိုက်မှ ၂၀၁၆ ခုနှစ်တွင် ပုံနှိပ်ထုတ်ဝေသော “Red Star Over China” စာအုပ်အား တွေ့ရစဉ် (ဆင်ဟွာ)

ပေကျင်း၊ ဇူလိုင် ၂ ရက် (ဆင်ဟွာ)

နွေရာသီအခါသမယတွင် တရုတ်နိုင်ငံ ဆန်ရှီးပြည်နယ် မြောက်ပိုင်း ယန်အန်းမြို့ ကျစ်သန်းခရိုင်ရှိ ပေါင်အန်းတော်လှန်ရေး သမိုင်းဝင်အမွေအနှစ်နေရာတွင် လာရောက်ကြည့်ရှုသူများဖြင့် စဉ်ဆက်မပြတ် စည်ကားလျက်ရှိသည်။ မော်စီတုန်း နေထိုင်ခဲ့ဖူးသော လိုဏ်ဂူပမာနေအိမ်လေးအတွင်းရှိ ကိုယ်တစ်ပိုင်းဓာတ်ပုံက အမြင်အာရုံကို ဆွဲဆောင်ထားသည်။ ဓာတ်ပုံတွင် ဦးထုပ်ဆောင်းထားသောသူတစ်ဦးက ဘယ်ဘက်သို့စောင်းကာ တင့်တယ်သောဟန်ပန်ဖြင့် ရင်ကော့ခေါင်းမော့ထားသည်။

ကီလိုမီတာ ၃၀၀ ကျော် ကွာဝေးသည့် နင်းရှကိုယ်ပိုင်အုပ်ချုပ်ခွင့်ရဒေသ ထုန်ရှင်းခရိုင်ရှိ တပ်နီတော် အနောက်ဘက်စစ်ဆင်ရေးခရီး အထိမ်းအမှတ်ပြတိုက်ရှေ့တွင် ဂန္ထဝင်ဓာတ်ပုံဖြစ်သည့် “ခုခံတော်လှန်ရေး၏စစ်ချီသံ” ရုပ်ပုံကို ပုံတူပြုထားသည့် တပ်နီတော်ရုပ်တုကြီး မားမားမားမတ်မတ် တည်ရှိနေသည်။ ၎င်းရုပ်တု၏ လက်ထဲရှိ စစ်တံပိုးသည် အချိန်ကာလများကို ကျော်ဖြတ်ကာ မှုတ်သံထွက်လာ၍ စစ်မက်မီးလျှံများ လွှမ်းခြုံထားသည့် အမျိုးသားရေးအန္တရာယ်ကာလကို ပြန်ရောက်သွားသည့်ပမာ လူအများကို ခံစားရစေသည်။

အဆိုပါ ဓာတ်ပုံနှစ်ပုံစလုံးမှာ အမေရိကန်သတင်းထောက် Edgar Snow ၏ လက်ရာဖြစ်သည်။ ၁၉၃၆ ခုနှစ်တွင် Snow သည် ပိတ်ဆို့မှုအထပ်ထပ်ကို ထိုးဖောက်ကာ ဆန်ရှီးပြည်နယ် မြောက်ပိုင်း တော်လှန်ရေးအခြေစိုက်စခန်းသို့ သွားရောက်၍ တွေ့ဆုံမေးမြန်းမှုများပြုလုပ်ခဲ့သည်။ ၎င်းသည် မြေပြင်လေ့လာမှုနှင့်အတူ မျက်မြင်ကိုယ်တွေ့ ဖြစ်ရပ်များဖြင့် “Red Star Over China” (အနီရောင်ကြယ်ပွင့်က တရုတ်နိုင်ငံတစ်ခွင်ကို ထွန်းလင်းတောက်ပစေ) ဟူသော စာအုပ်ကို ရေးသားပြီး တရုတ်ကွန်မြူနစ်ပါတီနှင့် တပ်နီတော်၏ အသွင်အပြင်ကို ပထမဆုံးအကြိမ်အဖြစ် ဓမ္မဓိဋ္ဌာန်ကျစွာ ကမ္ဘာထံသို့ သရုပ်မှန်ဖော်ပြခဲ့ရာ ယင်းစာအုပ်ထုတ်ဝေလိုက်သည်နှင့်တစ်ပြိုင်နက်တည်း တစ်ကမ္ဘာလုံးတွင် ရေပန်းစားလူကြိုက်များခဲ့သည်။

“တရုတ်ပြည်သူတွေက Edgar Snow ကို အစဉ်အမြဲ အမှတ်ရနေဆဲပါ။ သူက အစောဆုံး ကမ္ဘာကို တရုတ်တပ်နီတော်အကြောင်း မိတ်ဆက်ပေးခဲ့တယ်” ဟု ၂၀၂၃ ခုနှစ် နိုဝင်ဘာလတွင် သမ္မတ ရှီကျင့်ဖိန် အမေရိကန်နိုင်ငံသို့ သွား၍ တရုတ်-အမေရိကန် နိုင်ငံအကြီးအကဲများ ဆန်ဖရန်စစ္စကို တွေ့ဆုံဆွေးနွေးပွဲတက်ရောက်စဉ် Edgar Snow ၏ မျိုးဆက်သစ်အား လက်ခံတွေ့ဆုံစဉ်၌ ထိုသို့ ပြောကြားခဲ့ဖူးသည်။ (Xinhua)

သတင်းအပြည့်အစုံကို ဖော်ပြပါလင့်ခ်တွင် ဝင်ရောက်ဖတ်ရှုနိုင်ပါသည်။

http://xhtxs.cn/bdkY